Co actual ritmo de vida, parece que conseguir un bo descanso xa non é algo prioritario. Nalgún momento e por distintas circunstancias, todos experimentamos o ter unha “mala noite” ou insomnio ocasional e tamén as consecuencias que carrexa, como o sobre esforzo que nos require enfrontarnos ao día a día. E isto ocorre porque non lle damos ao noso organismo o tempo necesario para que se produza ese “reseteo ou posta a punto” que ocorre cando durmimos. O sono é unha necesidade biolóxica que permite o mantemento de funcións físicas e psicolóxicas esenciais.
Coa falta de sono diminúe a nosa capacidade de concentración e memoria, tamén afecta os reflexos e á nosa motricidade polo que sentímonos máis torpes. A nivel psicolóxico volvémonos máis sensibles a calquera alteración da contorna e mostrámonos irascibles coas persoas que nos rodean, afectando ás nosas relacións sociais. A falta de sono a longo prazo afecta a todo o organismo: ao sistema endócrino, ao sistema inmune, ao metabolismo e ao estado de ánimo, sendo nun factor de risco para distintas enfermidades como a obesidade, diabetes, enfermidades cardíacas ou trastornos mentais.
Durmir máis ou menos do que o noso corpo necesita podería ser un factor de risco para sufrir depresión ou outros trastornos mentais.
A hixiene do soño refírese ao conxunto de prácticas que nos axudan a durmir, para iso, é fundamental diferenciar o sono do descanso. É posible que a cantidade de sono recomendada de 6-8 horas estea a cumprirse pero non garante que nos espertemos coa sensación de descansar. A calidade do sono é máis importante que a cantidade do mesmo.
Algunhas prácticas saudables para mellorar o noso sono e descanso son as seguintes:
- Manter unha rutina para deitarse e levantase á mesma hora.
- Reducir ao mínimo as longas sestas.
- Tomar un baño quente antes de durmir.
- Realizar exercicio físico leve diariamente.
- Manter condicións que favorezan o soño, espazos escuros e sen ruído á hora de durmir.
- Evitar aparellos electrónicos unha hora antes de deitarse.
Tendemos a infravalorar a importancia de descansar o suficiente, con todo, o descanso é un factor esencial para a saúde e o benestar.
Durmir de forma saudable é unha necesidade para o benestar físico, mental e emocional.